Jahrbuch 2021

Jahrbuch Ehingen 2021 | 17 Die Familie Bachmann erstellte für Freunde der Fasnet einen digitalen Narrensprung. „Normalerweis‘ isch jetz’ soweit, Daß überall a Fasnet geit. Au z‘Ehgna woiß a jedes Kend, Daß jetz’ so manchr‘ Bürgr‘ spennt. Dr‘ Spritzamuck kommt dann an d‘Macht Ond regiert mit vollr‘ Pracht! Doch des Johr goht des leidr‘ id, D‘Fasnet isch ganz ussem Tritt. Jeder bleibt bei sich dohoi, A manchr‘ isch sogar alloi. Dr‘ Groggatäler bleibt em See, Do hotrs‘ sichr‘ richtig schee, Seine Dämona om sich rom, So schützt der sich, der isch id domm! A bißle gucktr‘ manchmol raus, Abr‘ er bleibt doch zu Haus! Au d‘Hexa kommet id en d‘Stadt, Des Virus setzt se älle matt. En dr‘ Käthrakuche hocka, Stricka dannt se Renglsocka. Senga, danza ond au g‘lacht, Dr‘ Hexamoischdr‘, der gibt acht, Daß älle en dr‘ Höhle bleibet Ond sich mit necka d‘Zeit v‘rtreibet. Was isch mit eisrm‘ Mate los? Mit seinr‘ Pfanna riesagroß? Von Schlechtafeld kommt der id rei, Sammlet au koi Eisa ei‘. Der bleibt en seinr‘ Bude denna, Am liabsta, dädr‘ kräftig flenna. Au seine Musikanta sand, Koi bißle ausser Rand ond Band. D‘Matekapell‘ spielt jo reacht gära, Des Johr id, - s‘isch grad zom blära. D‘Ehgnr‘ Kigala muß ma saga, Hört ma scho a bißle klaga. Kraut ond Doig hand se vill g‘macht, G‘schafft handse dofür Tag ond Nacht! Ond sand dia Kigala au id froh, Des Johr isch halt leidr‘ so. „D‘Mennr‘ miasset mir id traga“, Des hert ma d‘Krettaweibr‘ saga. Jedoch, wenn d‘Fasnet richtig wär, Koi Ma, wär für dia Weibr‘ z‘schwer! Dr‘ Spielmannszug ond d‘Stadtkapell, Sand an dr‘ Fasnet au zur Stell. Doch fällt des Spiela des Johr aus, Dia Musikr‘, bleibet zu Haus! Au dia Oberchefs vom Ganza, Kennet des Johr nena danza. Dia sand dohoim wia älle Leit, Denn dia sand schliaßlich au reacht g‘scheit! Doch wer gucket geschd ond heit, Noch dene Regla, liabe Leit? Denn schliaßlich muaß Kontrolle sei, Des leichtet sichr‘ jedem ei‘. Do hand mir doch de reachte Ma, Dia ma sowas hoißa ka. Gelbe Hosa, greene Kittl‘, Des sand eisre Narrabittl‘. Dia bassed auf bei Tag ond Nacht, Daß jo koinr‘ en Bledsenn macht. Sonschd geits von dene uff dr‘ Stell, En Strofzettl’ ond zwar ganz schnell! Au koi Ball wad des Johr sei. Koi Gläsle Sekt, koi Gläsle Wei, Mit ma Fasnetsschätzle trenka Ond beim tanza sich vr‘renka. Uff de Stroßa, en de Gassa, Sieht Ma koine Menschamassa. Des Ganze isch a scheenr‘ Käs‘, Ma sieht koi oizigs‘ Narrahäs! Übr‘ ällem aber isch, Dr‘Spritzamuck no richtig frisch. Muckaspritzer ommen rom, A manchr‘ guckt a bißle domm. Dr‘Spritzmuck abr‘ jetzt said: „Mir feiret Fasnet liabe Leit! Dohoim wad g‘schonklt, g‘songa, g‘lacht Ond a Fläschle Sekt aufg‘macht. Dr’zua en Narraspruch, en kählr‘, A richtig kräftigs‘ Grogga - Täler, Käthra - Kuche, Krätta - Weiber, Schreiet mir aus volle Leiber, Pfanna - Mate, Spritza - Muck, Do goht durch älle no en Ruck. Corona werred mir besiega, Mir lasset eis id ontr‘kriega! Ond dui beschissna Pandemie, Zwengt d‘Ehgner Fasnet id en d‘Knie! Denn nächstes Johr, des isch doch klar, Geits a Fasnet wonderbar! Danza, schonkla, trenka, lacha, Do land mirs‘ noch so richtig kracha! Des said dr‘Spritzamuck zu eich, Egal ob arm, egal ob reich. I bleib dui Fasnet au dohoi Dorauf zom Schluss drei KÜGELE – HOI, KÜGELE - HOI, KÜGELE- HOI!!!“ Fasnetsgedicht von Wolfgang Rothenbacher